Ngayah

Ngayah Sane Ngancan Punah

“Om Suastiastu”

Ngayah mateges laksana bakti sane madasar antuk manah suci, lascarya muwah tan pemerih. Ring sajeroning sastra Agama Hindu druene ngayahe punika madue teges sane pateh lawan yadnya. Nanging sesana ngayahe inucap sane ngancan rered ring kramane. Santukan kaliput antuk momangkara lan lobangkara. Yen dumun anake ngorahang “time is money” nanging mangkin kaorahang “everyting is money.” Makasami laksanan i manusane mangda kaajiang, lan makasami swakaryannyane mapemerih. Sane kaperihang boya wenten tios wantah jinah, jinah lan jinah.

Indike puniki raris sane ngawetuang baya agung ring jagate. Santukan sami manusane kakuwub antuk paribasane punika. Sekancan kaya, wak, lan manahnyane mapemerih jinah. Naenin titiang ngewacen ring surat kabar, wenten anak anak saking dura desa medangang bubur ayam sane nganggen kesumba mawarna kuning ring kuanhnyane, mangda ten merluang jinah sane akeh anggen numbas kunyit, cekuh, miwah reramon sane tiyosan. Punika sampun salah laku, lebih ngutamaang jinah, nanging keselametan lan kesukertan manusane kakorbanang. Rauh ring linggih ida sang sulinggih sane maraga putus, wenten panggih titiang sane swaginan idane ngadol banten. Yen sampun meadolan sinah sampun bati sane kaarepang. Yening inargamayang titiang sekadi tapak dara, pamargin manusane akehan nyujur garis sane kesamping kiwa lan tengen, nanging garis sane nyujur ngamenekang lan nganuunang kaengsapin. Sane ngawinang kauripane tan imbang. Sekadi atur titiange wawu laksanan manusane setata mapemerih, arang manusane sane malaksana sane tan mapemerih, arang manusane masesana ngayah.

Ratu ida dane pamiarsa sane banget wangiang titiang. Akeh jalaran iragane yening pacang ngemargiang sesana ngayahe punika. Ring sajeroning Bhagawad Gita, sargah IV, sloka 28 kaunggahang sekadi puniki :

Drawya yajnas tapo yajna, Yoga yajnas tathapare,

Swadhyaya jnana yajnas ca, Yatayah samsita wratah.

Tegesnyane wenten lelima jalaran imanusane ngayah utawi mayadnya. Inggih punika ngayah majalaran ngaturang arta brana, ngayah majalaran antuk ngelarang yoga semadi, ngayah majalaran antuk ngeret indria, ngayah mejalaran melajahin lan ngelimbakang sastra agama druene. Duaning wenten kecaping sastra agama sekadi asapunika, ngiring sane mangkin mapikamkam mikukuhin ngayahe punika, yening arta brana sane wenten ngiring arta branane punika puniayang, yening kawisayan sane kauningin ngiring kawisayane punika anggen ngaturang ayah, ngulati kesukertan jagat sekala lan niskala.

Yening rerehang titiang pertiwimba. Ring pondok titiang maderbe kekalih wit tunjung, sane siki sekarne mawarna selem, lan sane lianan sekarne mawarna kuning. Duaning sane sekarne mawarna kuning punika kantenang titiang luih pisan, nenten pisan naenin alap titiang sekarnyane, nanging sane sekarne mawarna selem punika nyabran rerainan alap titiang anggen titiang muspa ring merajan. Tunjung sane mawarna selem santukan nyabran rerainan alap titiang sane mangkin akeh pisan sekar ipun, meh wenten wawu panggih titiang limang pucuk. Nanging tunjung sane mawarna kuning punika kayang kemangkin kantun nunggal sekar ipun, yening siangnyane ipun mekar, lan kuncup yening sandikala. Minabang titiang sekadi asapunika imbannyane yening anake ngaturang ayah. Ratu ida dane sampunang sumanangsaya, arta branane nenten pacang ngereredang yening puniayang. Nanging tungkalikanipun yening arta brana sane kaaturang majanten arta branane jaga maweweh, yening kawisayan sane kaaturang majanten kawisayane punika taler nincap. Sekadi petapan sekar tujung selem sane aturang titiang iwawu, sane setata maweweh sekar ipun yening sampun anggen mayadnya.

“Om Çanthi, Çanthi, Çanthi Om.”